Meän tehtävä

Meilä oon selvä tehtävä. Met autama sitä joka ei ole saanu maksoa ja met annama tukea ja neuvoja sille joka pittää maksaa. Met huolehtimma kansa ette maksot tehhään oikeuenvarmala laila. Se oon hallitus joka vuosittaisin päättää kunka met piämä tehhä meän tehtävät ja mitä met piämä priuriteerata.

Tehtävä hallitukselta

Hallitus antaa meile meän tehtävät Säätänössä jossako oon ohje Kruunufoutiviranomhaiselle. Säänöspreivissä seisoo millä laila met piämä tehhä meän tehtävän ja mitä met piämä priuriteerata vuen aikana. Hallinon tehtävä meile oon ette met piämä:

• auttaa varmistamhaan finansieerinkiä julkisesta sektorista,
• auttaa hyvin toimivan yhtheiskunnan saavuttamisheen kansalaisile ja elinkeinoelämälle,
• vastustaa rikolisuutta

Tehtävvää met jaama Veroviraston ja Tulliviraston kansa.

Kunkas met sen tehemä?

Met tehemä meän tehtävät huolehtimalla ette se, jollako oon oikeus saaja makson, saapii sen. Se saattaa olla viranomhaiset, kunnat, yrittäjät elikkä privattihenkilöt jokka tahtovat meiltä apua ette saaja maksetuksi.

Met annama kansa tukea sille joka pittää maksaa hänen velkoja ja huolehtimma ette maksot tehthään oikeuenvarmala laila. Sen met tehemä muun muassa tekemällä töitä estävästi, tarjoamalla velkasanerausta ja auttamalla ko oon kyse riioista jokka ei koske maksoja, esimerkiksi ko oon kyse ette kyörätä jonku pois.

Met emmä koskhaan ota kantaa kenheen eestä, emmäkä vastusta kethään jokka asihaan kuuluvat.

Mitäs muuta met tehemä?

Mutta met tehemä paljon muuta. Tässä tullee esimerkkiä joistaki meän muista työtehtävistä:

• Se joka oon pahoin velassa saatta hakea velkasanerauksen meiltä. Met annama tukea niin ette se velotettu saattaa tulla takashiin elähmään ilman velkoja.
• Met yhtheistoimima eri viranomhaisitten, yrityksitten ja organisasuunitten kansa ette vähentää määrää ylivelotettuja yhtheiskunnassa, niin sanottu vähentää sitä ryhmää jollako oon enämpi elikkä vähempi vakituiset ongelmat ette maksaa heän velkoja.
• Met tarkastamma konkursihoitajan hantteerausta konkursista.
• Met tehemä työtä ette lisätä tiolisuutta privattiekonomiistä nuoritten ja täysitten kesken.
• Met olema osalistunheet ko joku joka ei ole maksanu hänen hyyryä kyöräthään pois.
• Met olema eksperttiviranomhainen jollako oon paljon tietoa velanoton vaikutuksista, niin yhtheiskunnale ko yksityisele intiviitile. Met annama tukea ja rahotamma niin ommaa ja ulkopuolista tutkintoa ette lisätä meän tietoa.