Velkasanerinki – sulle joka et koskhaan saata maksaa sinun velkoja

Sie, joka olet ylivelkanen, niin sanotusti ette sulla oon velkoja joitako sie et koskhaan saata maksaa, sie saatat saaja velkasanerinkin. Mutta sie häyt täyttää useampia vaatimuksia.

Mikäs velkasanerinki oon?

Velkasanerinki merkittee ette sie saat maksoplaanin ette maksaa takashiin osan sinun veloista jonku vuen aikana, viis vuotta privattihenkilöile ja kolme vuotta yrityksille. Loput veloista sie et tartte maksaa.

Kukas saattaa saaja velkasanerinkin?

Jos sie olet pahoin velkaintunnu sie saatat hakea velkasanerinkin. Se jällaa niin privattihenkilöitä ko yrityksiä.

Mikkäs oon vaatimukset velkasanerinkille?

• Sie et saata milhään laila maksaa sinun velkoja montheen vuotheen.
  
• Se oon kohtuulista huomihoon otettu sinun henkilökohtaset ja ekonoomiset olosuhtheet.
• Sie asut, olet töissä elikkä sulla oon sinun velat Ruottissa.
• Sulla jollako oon yksityinen yritys ekonomii yrityksessä pittää olle helppo tutkia.
• Sulla ei saa olla elinkeinokieltoa.

Kunkas se tehhään?

Lyhyvesti se tehhään näin:

• Sie haet velkasanerinkin meän tykönä meän e-palvelun kautta elikkä täyttämällä planketin. Jos sie tykkäät ette se oon hankala– ota apua pytjetti- ja velkaneuvonantajalta sinun kunnassa.
• Met tutkima jos sie täytät vaatimuksia velkasanerinkille. Jos sie tehet sen met otama väliaikhaisen päätöksen ette alottaa velkasanerinkin ja kunka paljon sie häyt maksaa.
• Sie piät alkaa maksamhaan sinun velkaa jo ko sie saat sen väliaikhaisen päätöksen.
• Met lähätämmä esityksen niile jollekko sie olet velassa rahhaa, johonka net saattavat vastata. Esityksessä oon kaikki sinun velat mikkä sulla oon ko sie alat maksamhaan.
• Vähän kertaa sie saat lopulisen päätöksen meiltä jossako seisoo kunka sinun velkasanerinki tehhään.
• Sie maksat maksoplaanin mukhaan. Jos sie elät eksistensimiinimillä sie saatat saaja päätöksen ilman maksoplaania. Silloin sie et maksa mithään sinun veloista. Yks poikkeus oon jos sie olet saanu velkasanerinkin yrittäjännä, silloin sie häyt aina maksaa sinun plaanin mukhaan.
• Ko velkasanerinki oon valmis, tavalisesti viien vuen päästä privattihenkilöile elikkä kolme vuotta yrittäjille, sulla ei ole ennää jäljelä niitä velkoja jokka kuuluit velkasanerinkhiin.